Казанның җәмәгать транспортында 136 битлек режимын бозучы ачыкланды

(Казан шәһәре KZN.RU, 23-нче октябрь). Чираттагы Казанның җәмәгать транспорты пассажирлары һәм экипажларының битлек режимы үтәлешен тикшерү рейды барышында 136 тәртип бозучы ачыкланган.

Автобусларда, трамвайларда, троллейбусларда һәм метрода шәхси саклану чаралары булуны Казан транспорт комитеты хезмәткәрләре, Татарстан Транспорт һәм юл хуҗалыгы министрлыгы белгечләре, Дәүләт автоинспекциясе хезмәткәрләре, «Пассажирлар ташуны оештыручы» МКУның контроль-ревизор хезмәте тикшерде.

Барлыгы 874 җәмәгать транспорты берәмлеге тикшерелде. Рейд нәтиҗәсендә тикшерүчеләр битлексез 136 пассажирны ачыклаган. Шуларның 132-се кисәтүдән соң шундук шәхси саклану чараларын кигән. Тагын дүрт пассажирга Эчке эшләр министрлыгы хезмәткәрләре беркетмә төзегән.

Җәмәгать транспортында рейдлар дәвам итәчәк, дип хәбәр итте транспорт комитеты.