Казан Мэриясенең 70тән артык хезмәткәре «Татарча диктант» акциясендә катнашты

Татарстанның халык артисты Фәнис Җиһаншин аларга Шәриф Камал әсәреннән өзек укыды

Бүген Татарстан башкаласы мэриясендә «Татарча диктант» бөтендөнья акциясе узды. Татар теленең орфографиясен һәм пунктуациясен белүләрен тикшерергә 70тән артык кеше килгән иде. Язучы Шәриф Камалның «Матур туганда» романыннан өзекне катнашучыларга Г.Камал театры актеры, Татарстанның халык артисты Фәнис Җиһаншин.

Шәһәр Башкарма комитеты җитәкчесе урынбасары Гүзәл Сәгыйтова залда утыручыларны сәламләде һәм акциядә катнашулары өчен рәхмәт белдерде. «Сезне күрүемә бик шат. Бүгенге көн Казан Мэриясендә генә түгел, бөтен дөньяда татар теленә булган мәхәббәтебезне һәм хөрмәтебезне күрсәтә. Бүген диктант язарга һәм белемнәрегезне тикшерергә килүегез өчен зур рәхмәт», — диде ул һәм катнашучыларга биремне үтәгәндә уңышлар теләде.

Диктант башланыр алдыннан Фәнис Җиһаншин тыңлаучыларга 1933-1935 елларда Г.Камал исемендәге театрда әдәбият бүлеге мөдире булган татар әдәбияты классигының биографиясен сөйләде. Соңыннан диктор беренче тапкыр танышу өчен диктант текстын укыды — катнашучылар аңлаешсыз ике сүзнең язылышын ачыклый алдылар. Аннары мэрия хезмәткәрләре әйтеп тору астында әсәрнең өзеген язып алганнар.

Һәр катнашучы символик бүләкләр алды: ТР Милли музеена һәм Татар китабы йортына өч көнлек билет, акция логотибы төшерелгән каләм һәм милли стильдәге беркетмә. Мэриядәге чара 45 минут чамасы дәвам итте.

Исегезгә төшерәбез, «Татарча диктант» акциясе онлайн һәм офлайн форматларда 8—10 ноябрьдә уза. Быел бирем текстлары беренче тапкыр латин әлифбасында бар — Tatar Grammar бергәлеге повестьның бер өзеген Россиядән читтә яшәүче катнашучылар өчен җайлаштырган.

Акцияне оештыручылар өч дәрәҗәдәге катлаулылык биремнәрен карадылар. Татарстан һәм Башкортстанда катнашучылар 210 сүздән торган катлаулы диктант яза. Чит ил вәкилләре өчен җиңел дәрәҗә әзерләнгән (Мирсәй Әмирнең «Агыйдел» повестеннан өзек), Россия төбәкләрендә яшәүчеләр өчен уртача дәрәҗә (Гомәр Бәширнең «Туган ягым – яшел бишек» әсәреннән өзек).

Диктантны укуны «ТНВ-Татарстан» һәм «ТНВ-Планета» телеканалларында артистлар һәм җәмәгать эшлеклеләре катнашында күрсәтәләр. Онлайн диктант язучыларга теркәлергә кирәк. Катнашучылар үз нәтиҗәләрен акциянең рәсми сайтыннан белә алачак.

Татарстан башкаласында акцияне уздыруның төп ноктасы Казан федераль университетының Филология һәм мәдәниятара багланышлар институты булды, анда 300ләп урын каралды. Монда ук ТР Милли музее һәм Татар әдәбияты тарихы музее тарафыннан оештырылган Шәриф Камалның 140 еллыгына багышланган күргәзмә була. Калган урыннар белән сылтама буенча танышырга мөмкин.

Узган ел акция 31 илдә узды, 5 меңнән артык мәйданчыкны колачлады. Онлайн диктантны 31 меңгә якын кеше язган, миллионнан артыгы көндезге форматта катнашкан. Акция Бөтендөнья татар яшьләре форумы, Бөтендөнья татар конгрессы, ТР Яшьләр эшләре министрлыгы, КФУ һәм башкалар тарафыннан оештырылган.