Константин Хабенский һәм Михаил Пореченков ТР башкаласында гаиләләр парадында чыгыш ясаячак

Казанда 15 нче майда елның масштаблы чараларының берсе – «Яшәсен гаилә» тантанасы узачак

Фото: Марат Мөгыйнов

Казанда 15 нче майда елның масштаблы чараларының берсе – «Яшәсен гаилә» бәйрәме узачак, анда 500 парның тантаналы йөреше планлаштырыла. Чарада илнең һәм республиканың беренче затлары, Россия эстрадасы йолдызлары һәм актерлар, шул исәптән Константин Хабенский һәм Михаил Пореченков чыгыш ясаячак. Ә яшьләр никахларын «Казан» гаилә үзәге янындагы мәйданчыкта шәһәр мэры Илсур Метшин катнашында терки алачак. Бу хакта Гаилә елы кысаларында уздырылачак чараларга багышланган матбугат конференциясендә билгеле булды.

Казанның Гражданлык хәле актларын теркәү идарәсе җитәкчесе Елена Студеникина сүзләренә караганда, чара Халыкара гаилә көнендә узачак. Тантана үзе дүрт блоктан торачак, алар озак еллар бергә гомер иткән парларга, гаилә династияләренә, күп балалы һәм яшь гаиләләргә багышланачак.

«Мультимедия технологияләре аша тамашачыларга әлеге парлар, аларның танышу һәм гаилә кору тарихлары, гаиләдәге кыйммәтләр һәм традицияләр, шулай ук бәхетле пар булып яшәүләренең серләре турында сөйләячәкләр. Барлык парлар да зур шоуда катнашачак һәм ил йолдызлары белән бергә сәхнәгә чыгачак», – диде спикер һәм барлык теләүчеләрне парадта катнашырга чакырды.

Исегезгә төшерәбез, 2023 елда Казанда 11 мең 743 пар өйләнешкән, ә аерылышулар саны 5,3% ка – 5005 очракка кадәр кимегән. Шул ук вакытта ТР башкаласы Идел буе федераль округының миллион халык яшәгән шәһәрләре арасында өйләнешүләр һәм аерылышулар нисбәте буенча иң яхшы күрсәткечләргә ия. Казан биш ел дәвамында үз позициясен саклый.

Юлия Летникова