Казанда интеллектуаль транспорт системасын киңәйтәләр: 13 светофорны юл хәрәкәте белән идарә итүнең автоматлаштырылган системасына тоташтыралар

Эшләр «Тормыш өчен инфраструктура» милли проекты кысаларында алып барыла

Агымдагы елда Татарстан башкаласында 13 светофор объектын интеллектуаль транспорт системаларына тоташтыру планлаштырыла. Бу юл хәрәкәте белән идарә итүнең нәтиҗәлелеген һәм шәһәр урамнарында куркынычсызлыкны тагын да арттырырга мөмкинлек бирәчәк. Эшләр «Тормыш өчен инфраструктура» милли проекты кысаларында алып барыла. Бу хакта бүген эшлекле дүшәмбедә Казан Башкарма комитеты җитәкчесе урынбасары Илдар Шакиров хәбәр итте.

«Тормыш өчен инфраструктура» милли проекты – шәһәр мохитен үстерүгә тулысынча якын килү, ул үз эченә юл челтәрен яңартуны гына түгел, ә иминлекне арттыруны, шәһәр халкы өчен уңайлылыкны яхшыртуны, интеллектуаль транспорт системаларын киңәйтүне һәм юл инфраструктурасын яңартуны да ала. Милли проектны гамәлгә ашыру 6 төбәк проекты кысаларында алып барыла.

Интеллектуаль транспорт системасы үсеше «Юл хуҗалыгын үстерүнең гомумсистема чаралары» төбәк проекты кысаларында бара. Бүген Казан урамнарында 515 светофор объектның 242се яраклаштырылган режимда эшли, дип сөйләде Илдар Шакиров. Алар Казанның юл хәрәкәте белән идарә итүнең автоматлаштырылган системасының бердәм идарә үзәгенә тоташтырылган.

Агымдагы елда системага тагын 13 светофор объектын тоташтыру планлаштырыла.

Хәрәкәт белән идарә итү өчен 783 транспорт детекторы һәм 333 видеокүзәтү камерасы урнаштырылган. Җәяүлеләрнең куркынычсызлыгын арттыру өчен шәһәрдә 42 проекцияле җәяүлеләр кичүе җиһазландырылган, ә 35 светофор объекты начар күрүчеләр өчен «Триоль» тавыш җайланмалары белән җиһазландырылган.

Интеллектуаль системаларны үстерүдән тыш, Казанда юл челтәрен ремонтлау эшләре дә актив алып барыла. Агымдагы елда гомуми озынлыгы 7 км булган 12 юл участогын төзәтү планлаштырылган. Бу эшләрне финанслауның гомуми күләме 1 млрд сум тәшкил итә. Эшләр комплексы юл өлешләренең, тротуарларның асфальт-бетон өслеген төзекләндерүне, куркынычсызлык киртәләрен, юл билгеләрен урнаштыруны, шулай ук тышкы яктырту челтәрләрен һәм светофор объектларын оештыруны күздә тота.

Болак аша Кави Нәҗми урамындагы һәм Достоевский урамындагы юл үткәргеч аша Романов күперен ремонтлау дәвам итә. Бүгенге көнгә объектларның әзерлеге 40% һәм 60% тәшкил итә. Моннан тыш, Вознесенск тракты төзелеше (Совет районында Җиңү проспектыннан алып М-7 «Волга» автомобиль юлына кадәр участокта) һәм Горький шоссесын төзекләндерү эшләре актив фазада тора.

Шулай ук быел Казанда өч объект төзекләндерелә: Серов урамындагы бульвар, Миславский урамындагы сквер, шулай ук Зур һәм Кече Акчарлак күлләре территорияләре.